ଅନିର୍ବାଣ୍ୟ ବହ୍ନି:ରଞ୍ଜନ ଭାଇ

ମାଧବାନନ୍ଦ ଭୋଇ

ଏକ ତାରିଖ,ଫେବୃୟାରୀ ୨୦୨୦ ମସିହା । ପ୍ରତିଦିନ ପରି ସକାଳୁ ସୋସିଆଲ ମିଡିଆରେ ପୋଷ୍ଟିଂ ଗୁଡିକ ଉପରେ ଦୃଷ୍ଟି ନିକ୍ଷେପ କରୁ କରୁ ,  ଗୋଟିଏ ପୋଷ୍ଟିଂ ଉପରେ ଆଖି ଲାଗି ରହିଗଲା  । ଛାତିଟା ଚାଉଁକରି ଲାଗିଲା । ହୃଦୟର ନିଭୃତ କୋଣରେ କୋହଟା ଜମାଟ ବାନ୍ଧିଲା ବେଳେ, ଅଲକ୍ଷରେ ଆଖିରୁ କେଇ ଟୋପା ଲୁହ ଠସ୍ ଠସ୍ କରି ଗଳି ପଡିଲା  । ସତରେ ରଞ୍ଜନ ଭାଇ ନାହିଁ ? ଏହା ପରେ କେତେ ଜଣ ସୂଚନାଧିକାରକର୍ମୀ ଭାଇମାନଙ୍କ ସହିତ କଥୋପକଥନ ପରେ ଘଟଣା ସଂପର୍କରେ କିଛି ଅଛପା ରହିଲା ନାହିଁ  । ହୁଏତ ରଞ୍ଜନ  ଭାଇ ପାଇଁ ଶୁକ୍ର ବାର ରାତି କାଳ ରାତ୍ରି ଥିଲା  ।ସର୍ବୋପରି ସୂଚନା ଅଧିକାର ଆଇନକୁ ପାଥେୟ କରି  ସମାର ଦୁସ୍ଥ ନିଷ୍ପେସିତ ମଣିଷ ପାଇଁ ଲଢୁଥିବା ସୈନିକଟି  ନୀରବି ଗଲା ଅଜଣା ଆତତାୟୀର ଅସ୍ତ୍ରରେ । ଦିବାଲୋକରେ ରଞ୍ଜନଙ୍କ ଶିଖାରେ ଦହି ହେଉ ଥିବା, କେନ୍ଦ୍ରାପଡାରେ କୁଚକ୍ରୀ ରାଜନେତାର ଚାମଚା ହୁଲିଗୁଣ୍ଡାଙ୍କ ହାତରେ ତାଙ୍କର ଜୀବନ ଦୀପଟି ନିର୍ବାପିତ ହୋଇ ଯାଇଥିଲା ବେରୁହାଁର  ନିଛାଟିଆ ରାସ୍ତା ପାଶ୍ୱର୍ରେ ।  

                  କାହାଣୀର ପୃଷ୍ଠଭୂମିକୁ ଅବଲୋକନ କଲେ,ରଞ୍ଜନ କୁମାର ଦାସ  ସଂପ୍ରତି ଐତିହାସିକ କେନ୍ଦ୍ରାପଡା ଜିଲ୍ଲା

ଅଧିନସ୍ଥ  ତାଳସଙ୍ଗା ପଂଚାୟତର ମାଣିକପୁର ଗ୍ରାମରେ ତା:୧୯.୧୨.୧୯୭୭ ରିଖରେ ଜନ୍ମ ଗ୍ରହଣ କରିଥିଲେ ।ସେ କେନ୍ଦ୍ରାପଡା ମହାବିଦ୍ୟାଳୟରେ ସ୍ନାତକ ଇତିହାସ ସମ୍ମାନରେ ଉତୀର୍ଣ୍ଣ ହୋଇ ଉକ୍ରଳ ବିଶ୍ୱବିଦ୍ୟାଳୟରୁ ଏମ୍.ଏ. ପାସ୍ କରିଥିଲେ । ପିତା ଲକ୍ଷ୍ମୀଧର ଦାସଙ୍କର ଏକମାତ୍ର ପୁତ୍ର ଥିଲେ  ମଧ୍ୟ ରଞ୍ଜନ ଭାଇ  ମରିବାର ତିନି ବର୍ଷ ପୁର୍ବରୁ କଟକରେ ରହୁଥିଲେ । ମାଆ ସ୍ବାସ୍ଥ୍ୟ ବିଭାଗର ସେବିକା  ଚାକିରୀରୁ ଅବସର ନେଲା ପରେ.ସେ ଅସୁସ୍ଥ ମାଆଙ୍କର ଯତ୍ନ ନେବା ପାଇଁ ମାଣିକପୁରରେ ରହୁଥିଲେ । ସେ ତିର୍ତୋଲରେ ଜନୈକ ଅବସରପ୍ରାପ୍ତ ବ୍ୟାଙ୍କ କର୍ମଚାରୀ ଝିଅଙ୍କୁ ବିବାହ କରିବା ସହିତ ଚାରି ବର୍ଷର ପୁଅ ମଧ୍ୟ ଅଛି ।ବିଶେଷ କରି ନିଜ କେନ୍ଦ୍ରାପଡା ମାଟିରେ ରଞ୍ଜନ ଭାଇ ଦୁର୍ନୀତି ଖୋର ନେତାମାନଙ୍କୁ ସାବାଡ୍ କରିବା ପାଇଁ  ଓଡିଶା ସୂଚନା ଅଧିକାର ଅଭିଯାନରେ ସକ୍ରିୟ ଅଂଶ ଗ୍ରହଣ କରିବା ସହିତ ସମାଜ ସେବାକୁ ନିଜ ଜୀବନର ବ୍ରତ ବୋଲି ଭାବି ନେଇଥିଲେ । ଏତ୍ଦ ବ୍ୟତୀତ ସେତେ ବେଳେ ରାଜ୍ୟରେ କୌଣସି ବିରୋଧୀ ଦଳର ଭୂମିକା ପରିଲକ୍ଷିତ ନ ଥିଲେ ମଧ୍ୟ,ଓସାର ଆବାହକ ପ୍ରଦୀପ ପ୍ରଧାନଙ୍କ ବ୍ୟକ୍ତିତ୍ୱରେ ଆକୃଷ୍ଟ ହୋଇ, ସତେ ଯେପରି ସାରା ଜୀବନ ନିରୀହ ଜନତାଙ୍କୁ ନ୍ୟାୟ ପ୍ରଦାନ ପାଇଁ ସଂଗ୍ରାମ ଜାରି ରଖିଥିଲେ । ପ୍ରଦୀପ ଭାଇ ମଧ୍ୟ ରଞ୍ଜନ ଭାଇଙ୍କ କଥାରେ ପ୍ରଭାବିତ ହୋଇ, ୨୦୧୬ରେ ଭୁବନେଶ୍ୱରସ୍ଥିତ ଇନ୍ଷ୍ଟିଚୁ୍ୟଟ ଅଫ ଇଞ୍ଜିନିୟରରେ ଅନୁଷ୍ଠିତ ହେଉଥିବା ଓଡ଼ିଶା ସୂଚନା ଅଧିକାର ଅଭିଯାନର ଦଶମ ରାଜ୍ୟସ୍ତରୀୟ ସମ୍ମିଳନୀ ଶେଷରେ ‘ଓସା’ର କର୍ମକର୍ତା ଚୟନ ସମୟରେ  ରଞ୍ଜନ ଭାଇଙ୍କୁ କୋର୍ କମିଟି ସଦସ୍ୟ ଭାବେ ନେବା ସହିତ କେନ୍ଦ୍ରାପଡ଼ା ଜିଲ୍ଲା ଆବାହକ ଦାୟିତ୍ୱ ଦେଇଥିଲେ । କେନ୍ଦ୍ରାପଡ଼ା ଜିଲ୍ଲାରେ ସଂଗଠନକୁ କ୍ରିୟାଶୀଳ କରିବା ପାଇଁ ପ୍ରତିଶ୍ରୁତି ଦେଇ ସେ ଘରକୁ ଫେରିଥିଲେ । ବିଶେଷ କରି ପୁଞ୍ଜିବାଦକୁ ବିରୋଧ କରୁଥିବା ରଞ୍ଜନ ଭାଇ କେନ୍ଦ୍ରାପଡାରେ ବାଂଲା ଦେଶୀ ଅନୁପ୍ରବେଶକାରୀ,ଇନ୍ଦିରା ଆବାସ ଦୁର୍ନୀତି, କସ୍ତୁରୀ ମୃତୁ୍ୟ,ଅବିନାଶ ପାଇଟାଳ ମୃତୁ୍ୟ, ବେଆଇନ ଖେଳ ପଡିଆ ନିର୍ମାଣ ଏବଂ ମନରେଗା ଦୁର୍ନିୀତି ପରି ଅନେକ ଘଟଣାରେ ହସ୍ତକ୍ଷେପ କରିବା ଫଳରେ ରାଜନେତା ଏବଂ ମାଫିଆଙ୍କ ଚକ୍ଷୁଶୀଳ ହୋଇ ପଡିଥିଲେ । ମହାକାଳପଡ଼ା, ମାର୍ଶାଘାଇ, ରାଜନଗର, ପଟ୍ଟାମୁଣ୍ଡାଇ ଇତ୍ୟାଦି ବ୍ଲକରେ ସୂଚନା ଆଇନ୍ ସମ୍ପର୍କରେ ସଚେତନତା କାର୍ଯ୍ୟକ୍ରମ ସହ ଅନେକ ଦୁର୍ନୀତି ଲୋକଲୋଚନକୁ ଆଣିଥିଲେ । ଯାହା ଦ୍ୱାରା କେନ୍ଦ୍ରାପଡା ଅଂଚଳରେ ଦୁର୍ନୀତିଖୋର ନେତାଙ୍କ ପାଇଁ ରଞ୍ଜନ ଏକ କଂଟକ ସଦୃଶ ପ୍ରତୀୟମାନ ହୋଇ ସେମାନଙ୍କ ମୁଣ୍ଡ ବ୍ୟଥାର କାରଣ ପାଲଟିଥିଲେ । ଏତଦ୍ ବ୍ୟତୀତ ରଞ୍ଜନ ଭାଇ ପ୍ରଧାନମନ୍ତ୍ରୀ ଆବାସ ଯୋଜନା,ପ୍ରଧାନମନ୍ତ୍ରୀ ଗ୍ରାମ୍ୟ ସଡକ ଯୋଜନା,ବେଆଇନ୍  ନଦୀ ବାଲି ଚାଲାଣ,ଚିଙ୍ଗୁଡି ମାଫିଆ,ମଦ ମାଫିଆ,ଠିକାଦାର,ବେଆଇନ୍ ଇଟା ଭାଟି ଗୁଡିକ ସଂପର୍କରେ ସୂଚନା ଅଧିକାର ଆଇନ ମାଧ୍ୟମରେ ତଥ୍ୟ ଆଣିବା ସହିତ ସାମାଜିକ ଗଣ ମାଧ୍ୟମରେ ଉପସ୍ଥାପନ କରୁଥିଲେ । ଯାହା ଫଳରେ ଅନେକ ଭଦ୍ରମୁଖା ନେତାଙ୍କର ମୁଖା ଖୋଲି ଯାଇଥିଲା । ବିଶେଷ କରି ସୌନ୍ଦର୍ଯ୍ୟକରଣ ନାମରେ ସାମୁଦ୍ରିକ ବେଳାଭୂମି ଠାରୁ ୫୦୦ ମିଟର ନିଷିଦ୍ଧାଂଚଳରେ ଭିତର କନିକା ଜାତୀୟ ଉଦ୍ୟାନ ପରିସରରେ  ହେଉଥିବା ଓଡିଶା ପର୍ଯ୍ୟଟନ ଉନ୍ନୟନ ନିଗମ ତରଫରୁ ଦୁଇ ବର୍ଷ ପୂର୍ବେ ହେଉଥିବା ବେଆଇନ୍ ନିର୍ମାଣ ସଂପର୍କରେ ତାଙ୍କର ଦୃଷ୍ଟି ଗୋଚର ହୋଇଥିଲା । ଏ ସଂପର୍କରେ ସେ ସୂଚନା ଆଇନ୍ ମାଧ୍ୟମରେ ତଥ୍ୟ ମାଗି,ପ୍ରଶାସନକୁ ଅକଳରେ ପକାଇଥିଲେ । ଏହି ଭିତର କନିକା ଜାତୀୟ ଉଦ୍ୟାନରେ ବେଳାଭୂମି କ୍ଷୟ ନିରାକରଣ ବାବଦରେ  ପ୍ରାୟୋଜିତ ପ୍ରକଳ୍ପ ମାଧ୍ୟମରେ  ବୃକ୍ଷରୋପଣ ନାମରେ ୨୫ ଲକ୍ଷ ଟଙ୍କା ଅନୁଦାନ ହଡପ ହୋଇଛି ବୋଲି ମଧ୍ୟ ଧରାପଡିଥିଲା । ଏହା ଦ୍ୱାରା  ପ୍ରଶାସନ ଏବଂ ଦୁର୍ନିୀତିଖୋର୍ ନେତାମାନେ ରଂଜନଙ୍କ ପ୍ରତି ରକ୍ତ ମୁଖା ହୋଇ ଯାଇଥିଲେ ।

                 ଏତଦ୍ ବ୍ୟତୀତ ରାଜ୍ୟ ସ୍ତରୀୟ ବିଭିନ୍ନ ଦୁର୍ନୀତି ସଂପର୍କରେ ସୂଚନା ଆଇନକୁ ଅସ୍ତ୍ର କରି ଖୁଲାସା କରିଥିବାରୁ, ସେ ନିଜର ସ୍ବତନ୍ତ୍ର ପରିଚୟ ସୃଷ୍ଟି କରିଥିଲେ ।ରଞ୍ଜନ ଭାଇ ମଧ୍ୟ ନିୟମିତ ସୋସିଆଲ ମିଡିଆରେ ସରକାର ଏବଂ ସ୍ଥାନୀୟ ବିଧାୟକଙ୍କ ଦୁର୍ନୀତି ସପର୍କରେ ପୋଷ୍ଟିଂ କରୁଥିଲେ ।ଫଳରେ ୠଞ୍ଜନ ଭାଇଙ୍କ ଉପରେ ବହୁତ ଥର ଆକ୍ରମଣ ହୋଇଥିଲା ଓ ଫୋନ୍ ଯୋଗେ ମାରିଦେବାର ଧମକ ଆସୁଥିଲା । ଏସଂପର୍କରେ ଓସାର କର୍ମୀମାନଙ୍କୁ  ଏବଂ ସ୍ଥାନୀୟ ଥାନାରେ ଅବଗତ କରିଥିଲେ ମଧ୍ୟ ପୋଲିସ ପ୍ରଶାସନ ତାଙ୍କୁ ସୁରକ୍ଷା ଦେଇ ନଥିଲା । ଦୁର୍ନୀତିଖୋର ରାଜନେତା ଏବଂ ମାଫିଆମାନଙ୍କ ବିରୋଧରେ ଲଢିବା ଓ ସାଧାରଣ ଜନତାଙ୍କୁ ନ୍ୟାୟ ପ୍ରଦାନ କରିବା ପାଇଁ ସଂଗ୍ରାମ କରିବା ତାଙ୍କର ଜୀବନରେ ବ୍ରତ ଥିଲା ଯାହା ସେ ମୃତୁ୍ୟ ପର୍ଯ୍ୟନ୍ତ ଜାରି ରଖିଥିଲେ । ରଞ୍ଜନ ଭାଇଙ୍କୁ ହତ୍ୟା କରାଯିବାର ୫ ଦିନ ପୂର୍ବରୁ ଅର୍ଥାତ୍ ୨୭ ଜାନୁୟାରୀ, ୨୦୨୦ରେ ସେ ଓଡ଼ିଶା ଲୋକାୟୁକ୍ତରେ ଦୁର୍ନୀତି ସମ୍ପର୍କରେ ଦୁଇଟି ଅଭିଯୋଗ କରିଥିଲେ । ଗୋଟିଏ ଅଭିଯୋଗ ହେଉଛି-ମହାକାଳପଡ଼ା ବ୍ଲକର ବଡ଼କୁଳ ଗ୍ରାମପଂଚାୟତରେ ଇନ୍ଦିରା ଆବାସ ଯୋଜନାରେ ବ୍ୟାପକ ଜାଲିଆତି ଓ ଘୋଟାଲା । ଦ୍ୱିତୀୟ ଅଭିଯୋଗ ହେଉଛି, ଭିତରକନିକା ଅଭୟାରଣ୍ୟ ନିକଟସ୍ଥ ଅଂଚଳରେ ସରକାରୀ ନୀତିନିୟମକୁ ଉଲଂଘନ କରି ପରିବେଶ ସମ୍ବେଦନଶୀଳ ଅଂଚଳ ରେ ଚିଙ୍ଗୁଡ଼ି •ଷ କରିବା । ଲୋକାୟୁକ୍ତ ଉକ୍ତ ଦୁଇ କେସ୍କୁ ଗ୍ରହଣ କରି ତଦନ୍ତ ଆରମ୍ଭ  ହୋଇଅଛି ।

ଋଞ୍ଜନ ଭାଇ  ମଧ୍ୟ ଓଡିଆ ଭାଷା ଆନ୍ଦୋଳନର ଜଣେ ସକ୍ରିୟ କର୍ମୀ ଥିଲେ  । ରାଜ୍ୟରେ ବରିଷ୍ଠ ସାମ୍ବାଦିକ ସୁବାସ ପଟ୍ଟନାୟକଙ୍କ ନେତୃତ୍ୱରେ •ଲିଥିବା ଭାଷା ଆନ୍ଦୋଳନକୁ ସମର୍ଥନ ଜଣାଇ କଳାପତକା ଅଭିଯାନରେ ସାମିଲ ହୋଇଥିଲେ ।  “ଜନ୍ମନୀ ଜନ୍ମନୀ ଭାଷା ଜନନୀ” ନାରାରେ ଉଦବୁଦ୍ଧ ହୋଇ ଏକଦା ରଞ୍ଜନ ଭାଇ ତାଙ୍କ ସାଥୀମାନଙ୍କୁ ଧରି ଭାଷା ଆନ୍ଦୋଳନକୁ ସମର୍ଥନ ଜଣାଇବା ପୂର୍ବକ କଟକ ଜିଲ୍ଲା ଉକ୍ରଳ ଗୌରବ ମଧୁସୂଦନ ଦାସଙ୍କ ଜନ୍ମସ୍ଥାନ ସତ୍ୟଭାମାପୁରରୁ ପଦଯାତ୍ରାରେ ଆସି ଭୁବନେଶ୍ୱରରେ ପହଂଚିଥିଲେ ।  ଏଥିପାଇଁ ମଧ୍ୟ  ସେ ସମ୍ବର୍ଦ୍ଧିତ ହୋଇଥିଲେ ।ଏହା ସେଙ୍ଗ ସେଙ୍ଗ ମରିବାର କିଛି ଦିନ ପୂର୍ବରୁ ଉକ୍ରଳ ବିଶ୍ୱ ବିଦ୍ୟାଳୟର  ବନ୍ଧୁ ମିଳନରେ ଯୋଗ ଦେଇଥିଲେ ।

ଏହିପରି ଭାବରେ ରଞ୍ଜନ ଭାଇଙ୍କ ସହିତ ଓସାର ବିଭିନ୍ନ ବୈଠକରେ ସାକ୍ଷାତ ହୁଏ  ।ଏତଦ୍ ବ୍ୟତୀତ  ଭାଷା

ଆନ୍ଦୋଳନର ନେତୃତ୍ୱ ନେଉଥିବା ସୁବାସ ଭାଇଙ୍କ ବୈଠକରେ ମଧ୍ୟ ତାଙ୍କ ସାକ୍ଷାତ ହୋଇଥାଏ । ଦୁର୍ନୀତି ସଂପର୍କରେ ଆଲୋଚନା ହେଲେ ମଧ୍ୟ ସେ ବହୁତ ଖୁସ ମିିଞ୍ଜାସର ବ୍ୟକ୍ତିତ୍ୱ ଥିଲେ । ଅନେକ  ସମୟରେ ମୁଁ ଏକ ୱେବ୍ ନିଉଜ ଚ୍ୟାନେଲରେ ଲେଖାଲେଖି କରୁଥିବା ସମୟରେ, ସେ ମୋତେ ଆଇଆ ନିଉଜର ସାମ୍ବାଦିକ ଭାଇ ବୋଲି ଚିଡାଉଥିଲେ ।  ତେବେ  ଓଡିଆ ସାହିତ୍ୟ  ଏବଂ ଭାଷା ପ୍ରତି ରଞ୍ଜନ ଭାଇଙ୍କ  ଅହେତୁକ ରୁଚି ଥିଲା । ଏକଦା ମୋର ସାହିତ୍ୟ ସଂଗଠନ ଉଦୟ ଭାନୁର ଏକ ପତ୍ରିକାର ସମ୍ପାଦନା କରୁଥିବା ସମୟରେ, ସେ  ଏକ ନିବନ୍ଧ “ମହାକାଳପଡା କିଛି କଥା,କିଛି ବ୍ୟଥା-ପଲ୍ଲୀଗଡ  ଏକ ଅନାଲୋଚିତ ଇତିହାସ”  ମୋତେ ପ୍ରକାଶ କରିବା ପାଇଁ ଦେବା ସହିତ ଭଲ ହୋଇଛି କି ନାହିଁ  ପଚାରିଥିଲେ  । ତେବେ ଏହା “ଉଦୟ ଭାନୁ”ରେ ପ୍ରକାଶିତ ହେବା ସହିତ ଆମର ସମ୍ପାଦନା ମଣ୍ଡଳୀଙ୍କ ଦ୍ୱାରା ଆଦୃତ ହୋଇ ମାସିକ ଶ୍ରେଷ୍ଠ ଲେଖା ଭାବରେ  ରଞ୍ଜନ ଭାଇଙ୍କୁ ଇ-ମାନପତ୍ର ପ୍ରଦାନ କରା ଯାଇଥିଲା  । ଓଡିଆ ସାହିତ୍ୟ ପ୍ରେମ ହେତୁ ଏହା ପରେ କାହିଁକି କେଜାଣି ରଞ୍ଜନ ଭାଇଙ୍କ ପ୍ରତି ମୋର ଦୁର୍ବଳତା ବଢିଯାଇଥିଲା  । ସମୟେ ସମୟେ ଆମେ ଦୁର୍ନୀତି ସମ୍ପର୍କିତ ଯେତିକି କଥା ହେଉଥିଲୁ ,ଓଡିଆ ସାହିତ୍ୟ ସମ୍ପର୍କରେ ମଧ୍ୟ ସେତିକି ଆଲୋଚନା କରୁଥିଲୁ  । ବିଶେଷକରି କେନ୍ଦ୍ରାପଡାର ଅନେକ ଐତିହାସିକ ତଥ୍ୟ ସହିତ ଜନ ସାଧାରଣଙ୍କ ସମସ୍ୟାକୁ କିପରି ଭାବରେ ସାହିତ୍ୟରେ ପ୍ରତିଫଳିତ କରାଯାଇ ପାରିବ, ସେ ସର୍ବଦା କଥା ଛଳରେ ପ୍ରକାଶ କରୁଥିଲେ । ଏତଦ୍ ବ୍ୟତୀତ ବାବା ସାହେବ ଆମ୍ବେଦକରଙ୍କ ବିଚାରଧାରାରେ ଅନୁପ୍ରାଣିତ ହୋଇ ସେ ଦଳିତ ନିଷ୍ପେସିତ ଜନତାଙ୍କର ଅନେକ ସମସ୍ୟା ସମାଧାନ କରୁଥିଲେ ।

ସମୟ ବିତିଯାଏ । ଜୀବନ ଚକ୍ର ବି ବଦଳି ଯାଏ  । ବିଶେଷ ଭାବରେ ରଞ୍ଜନ ଭାଇଙ୍କ ମୃତୁ୍ୟ ଘଟଣାର ପୂର୍ବ

ଦିନକୁ ଅନୁଧ୍ୟାନ କଲେ, ରଞ୍ଜନ ଭାଇ ଗତ ୨୦୨୦ ଜାନୁୟାରୀ ୩୧ ତାରିଖ ଦିନ ସକାଳ ୯ ଘଟିକା ସମୟରେ ନିଜ ମାଆଙ୍କ ଔଷଧ ପାଇଁ ବାହାରି ଯାଇଥିଲେ । ତେବେ ପୂର୍ବରୁ ରଞ୍ଜନ ଭାଇ, ନିଜର ସୁରକ୍ଷା ଦୃଷ୍ଟିରୁ ଘରେ ସିସି କ୍ୟାମେରା ଲଗାଇଥିଲେ ମଧ୍ୟ, ବିକ୍ରେତା ସିସି କ୍ୟାମେରାକୁ ଖୋଲି ନେଇ ଯାଇଥିଲା ଏବଂ ହତ୍ୟା ଦିନ ସ୍ଥାନୀୟ ହୁଲି ଗୁଣ୍ଡାମାନେ ତାଙ୍କ ଗତିବିଧି ଉପରେ ନଜର ରଖିଥିଲେ । ଘରକୁ ଫରିବା ସମୟରେ ପ୍ରାୟ ରାତି ନଅଟା ସୁଦ୍ଧା ସାଙ୍ଗମାନଙ୍କ ସହ ସ୍ଥାନୀୟ ପାଂଚ ନମ୍ବର ରାଜପଥ ହଳଦିଆ ଗଡା ଢାବାରେ ଖାଇଥିଲେ ଏବଂ କଥା ବାର୍ତା ଛଳରେ ମୋ ଜୀବନ ପ୍ରତି କେତେବେଳେ କଣ ଘଟିବ ବୋଲି କହି ରଞ୍ଜନ ଭାଇ ନିଜର ଘରକୁ ବାହାରିଥିଲେ । ସମୟ ପ୍ରାୟ ଘ୧୦.୨୫ ମିନିଟ୍ ହେବ ସେ ଜନୈକ ସାଙ୍ଗଙ୍କ ସହିତ ମୋବାଇଲରେ କଥା ହୋଇଥିଲେ । “ମୁଁ କୋଳଥ ନେଇ କରି ଯିବି ,କାଲି ଆମେ  ଭୋଜି କରିବା, ମଣିଷ ଆଉ କେତେ ଦିନ ବଂଚିବ ?” ମାତ୍ର ଏହା ତାଙ୍କ ଜୀବନର ଶେଷ ରାତି ଆଉ ଶେଷ କଥା ଥିଲା ।ରଞ୍ଜନ ଭାଇ ହଳଦିଆ ଗଡା ଛକ ଠାରୁ ପାଟକୁରାର ଆନୁମାନିକ ଦଶ କିଲୋମିଟର ରାସ୍ତାରେ ନ ଯାଇ,ତିନି କିଲୋମିଟର ବେରୁହାଁ-ମାଣିକପୁର ରାସ୍ତାରେ ଯାଇଥିଲେ । ଏହା ଏକ ଗଛ ଲତା ପୁର୍ଣ୍ଣ ନିଛାଟିଆ ରାସ୍ତା ଥିଲା । ପ୍ରକାଶ୍ୟ ଯେ ଏହି ଦିନ  ଏହି ରାସ୍ତାରେ ଚାରି ପାଂଚ ଜଣ  ଏକ ଚାରି ଚକିଆ ଗାଡିରେ କାହାକୁ ଅନୁଧାବନ କରୁଥିଲେ । ହୁଏତ ରଞ୍ଜନ ଭାଇ ହିଁ ତାଙ୍କର ଶିକାର ଥିଲେ ।ଶେଷରେ ସକାଳୁ ସକାଳୁ ଏହି ରାସ୍ତା ପାଶ୍ୱର୍ରେ  ଏକ ଧାନ କ୍ଷେତରୁ ମୁହଁ ମାଡି ପଡିଥିବା ଅବସ୍ଥାରେ ତାଙ୍କ ମୃତ ଦେହ ମିଳିଥିଲା ଏବଂ ମେନ୍ ଷ୍ଟାଣ୍ଡ ମରା ହୋଇ ବାଇକଟି ତାଙ୍କ ଉପରେ ପଡିଥିଲା । ମୁଣ୍ଡ ତଳେ ତାଙ୍କର ନିତ୍ୟ ବ୍ୟବହୃତ ବ୍ୟାଗଟି ଥିଲା । ଦୁଇଟି ମୋବାଇଲ୍ ମଧ୍ୟରୁ  ସ୍କ୍ରିନ୍ ଟଚ୍ ମୋବାଇଲ ମିଳି ଥିଲେ କି ପ୍ୟାଡ୍ ମୋବାଇଲଟି ନ ମିଳି ନ ଥିଲା । ସୁପରିକଳ୍ପିତ ଭାବରେ ହେଲମେଟଟି ମଧ୍ୟ ନିକଟରେ ଥୁଆ ହୋଇଥିଲା । ତେବେ ଏହା ସୁପରି କଳ୍ପିତ ହତ୍ୟାକାଣ୍ଡ ଏବଂ ଏଥିରେ ପ୍ରାୟ ଏକାଧିକ ବ୍ୟକ୍ତି ସଂପୃକ୍ତ ଥିବା  ଜଣା ପଡୁଥିଲେ ମଧ୍ୟ ପୋଲିସ ପ୍ରଶାସନ ଚୁପ୍  ରହିଲା କାହିଁକି, ଯାହା ଅଦ୍ୟାବଧି ଜନ ସାଧାରଣଙ୍କ ମନରେ ଅସମାହିତ ପ୍ରଶ୍ୱଟିଏ ଠିଆ ହୋଇଛି  । କିନ୍ତୁ ପୋଲିସ ହାତ ଖାଲି  ।ଏହା ଏକ ସୁପରିକଳ୍ପିତ ହତ୍ୟାକାଣ୍ଡ ଦର୍ଶାଇ ରଞ୍ଜନଙ୍କ ପରିବାର ତରଫରୁ ମାର୍ଶାଘାଇ ଥାନାରେ ଏତଲା ଦିଆଯିବା ସହ ଏହାର ତଦନ୍ତ କରାଯାଇ ସମ୍ପୃକ୍ତ ଅପରାଧୀଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଦାବୀ କରାଯାଇଥିଲା ।ପୋଲିସ ଉକ୍ତ ଅଭିଯୋଗକୁ ପଞ୍ଜୀକୃତ କରି (କେସ୍ ସଂଖ୍ୟା ୨୪/୨୦୨୦) ତଦନ୍ତ ଆରମ୍ଭ କରିଥିଲା ।

                  ଆରମ୍ଭରୁ ରଞ୍ଜନଙ୍କ ପରିବାର ଲୋକେ ପୋଲିସ୍ ତଦନ୍ତକୁ ସନ୍ଦେହ ଚକ୍ଷୁରେ ଦେଖିବା ସହିତ ଏଥିରୁ ନ୍ୟାୟ ନ ମିଳିବା ନେଇ ବାରମ୍ବାର ଅଭିଯୋଗ କରି ଆସୁଥିଲେ । କାରଣ ପୂର୍ବରୁ ରଞ୍ଜନଙ୍କ ଉପରେ ବାରମ୍ବାର ଆକ୍ରମଣ,ହତ୍ୟା ଧମକ ସମ୍ପର୍କିତ ହୋଇଥିବା ଅଭିଯୋଗ ଉପରେ ପାଟକୁରା ବା ମାର୍ଶାଘାଇ ପୋଲିସ୍ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରି ନ ଥିଲା । ତେଣୁ ପୋଲିସ ଏବଂ ଅପରାଧୀଙ୍କ ମଧୁ ଚନ୍ଦ୍ରିକା ହେତୁ ତାଙ୍କ ତାଙ୍କ ଅଭିଯୋଗକୁ ପୋଲିସ ତଦନ୍ତ  ନ କରି  ଚାପି ଦେଉଥିବାର ଅଭିଯୋଗ ରଞ୍ଜନ ବାରମ୍ବାର କରିଥିଲେ ଏବଂ  ତାଙ୍କ ଜୀବନ ପ୍ରତି ବିପଦ ଥିବାର ଅଭିଯୋଗ ସାମାଜିକ ଗଣ ମାଧ୍ୟମରେ ପ୍ରକାଶ କରି ଆସୁଥିଲେ । ରଞ୍ଜନ ହତ୍ୟାକାଣ୍ଡର ପୋଲିସ ତଦନ୍ତର ଅଗ୍ରଗତି ସମ୍ପର୍କରେ କୌଣସି ତଥ୍ୟ ପରିବାରକୁ ଜଣାଉନଥିଲା । ଠିକ୍ ଏହି ସମୟରେ ତା୧୦/୦୩/୨୦୨୦ରିଖରେ ହୋଲି ଖେଳ ଦିନ ସ୍ଥାନୀୟ ଅପରାଧୀ ତ୍ରିଲୋଚନ ବାରିକ ସର୍ବ ସମ୍ମୁଖରେ ସେମାନେ ରଞ୍ଜନ ଦାସଙ୍କୁ ହତ୍ୟା କରିଛନ୍ତି ଏବଂ ଆହୁରି ଦୁଇ ଜଣଙ୍କୁ ହତ୍ୟା କରିବେ ବୋଲି କହିଥିଲେ । ଏ ସମ୍ପର୍କରେ ମୃତ ରଞ୍ଜନଙ୍କ ବାପା ଲକ୍ଷ୍ମୀଧର ଦାସ ପାଟକୁରା ଥାନାରେ ଅଭିଯୋଗ କରିଥିଲେ ମଧ୍ୟ ପୋଲିସ କୌଣସି ତଦନ୍ତ କରି ନଥିଲେ ।ସେହିପରି ଗତ ତା୧୫.୦୩.୨୦୨୦ରିଖରେ ବିଜୁ ଜନତା ଦଳ ସହିତ ସମ୍ପୃକ୍ତ ଠିକାଦାର ବିବେକ ଜେନା ସମେତ ପାଂଚ ଅପରାଧୀ ରଞ୍ଜନର ଘରକୁ ଆସି ତାର ବାପାଙ୍କୁ ଜାତିଗତ ଆକ୍ଷେପ କରି ନୀରବ ରହିବାକୁ ଧମକ ଦେଇଥିଲେ । ଏ ସମ୍ପର୍କରେ ରଞ୍ଜନଙ୍କ ବାପା ଥାନାରେ ଅଭିଯୋଗ କରିଥିଲେ ମଧ୍ୟ ରାଜନୈତିକ ଚାପରେ ପୋଲିସ ତଦନ୍ତ କରି ନଥିଲା ।

      ଗତ ତା୧୩.୦୫.୨୦୨୦ରିଖରେ ରଞ୍ଜନଙ୍କ ବାପା ବ୍ୟକ୍ତିଗତ ଭାବେ କ୍ରାଇମ୍ ବ୍ରାଂଚ ନିର୍ଦ୍ଦେଶକଙ୍କୁ ଭେଟି ରଞ୍ଜନ

ହତ୍ୟାକାଣ୍ଡର କ୍ରାଇମ୍ ବ୍ରାଂଚ ତଦନ୍ତ ପାଇଁ ନିର୍ଦ୍ଦେଶ ଦେବାକୁ ଅନୁରୋଧ କରିଥିଲେ । ସେହିପରି ଓଡିଶା ସୂଚନା ଅଧିକାର ଅଭିଯାନ ତରଫରୁ ତା୦୩/୦୮/୨୦୨୦ରିଖରେ କ୍ରାଇମ୍ ବ୍ରାଂଚ ଏ.ଡି.ଜି.ଙ୍କୁ ଭେଟି ତଦନ୍ତ ପାଇଁ ସ୍ମାରକ ପତ୍ର ପ୍ରଦାନ କରାଯାଇଥିଲା । ଗତ ଫେବୃୟାରୀରେ ତା୦୯/୧୦/୨୦୨୦ରିଖରେ ଦେଶର ପ୍ରମୁଖ ଚଉଦ ଜଣ ଅବସରପ୍ରାପ୍ତ ପ୍ରଶାସନିକ ଅଧିକାରୀମାନେ ମୁଖ୍ୟମନ୍ତ୍ରୀଙ୍କୁ ଚିଠି ଲେଖି ରାଜ୍ୟରେ ସୂଚନା ଅଧିକାରକର୍ମୀମାନଙ୍କୁ ଲଗାତର ହତ୍ୟା ଉପରେ ଗଭୀର ଅସନ୍ତୋଷ ପ୍ରକାଶ କରିବା ଦୋଷୀମାନଙ୍କୁ ତୁରନ୍ତ ଦଣ୍ଡ ଏବଂ ପରିବାରଙ୍କୁ ସୁରକ୍ଷା ଦେବା ପାଇଁ ଅନୁରୋଧ କରିଥିଲେ । ରଞ୍ଜନ ହତ୍ୟାକାଣ୍ଡ ସମ୍ପର୍କରେ ହୋଇଥିବା ଅଭିଯୋଗ ନଂ.୨୭୧/୨୦୨୦କୁ ଲୋକାୟୁକ୍ତ ଗ୍ରହଣ କରି ପୋଲିସ୍ ମହାନିର୍ଦ୍ଦେଶକଙ୍କୁ ଜବାବ ଦାଖଲ ପାଇଁ ନୋଟିସ୍ ଜାରି କରିଥିଲେ । ଗୃହ ବିଭାଗ ତରଫରୁ ଗତ ତା୦୮/୧୧/୨୦୨୦ରିଖରେ କେନ୍ଦ୍ରାପଡା ଏସ୍.ପି.ଙ୍କ ରିପୋର୍ଟକୁ ଆଧାର କରି ଜବାବ ଦାଖଲ କରାଯାଇଥିଲା । ଏହି ରିପୋର୍ଟରେ ରଞ୍ଜନ ହତ୍ୟାକାଣ୍ଡକୁ ଏକ ଦୁର୍ଘଟଣା ଦର୍ଶାଇ ତଦନ୍ତକୁ ବନ୍ଦ କରିଦେଇଥିବା ସମ୍ପର୍କରେ ଉଲ୍ଲେଖ ଥିଲା । ଏଥିରୁ ସ୍ପଷ୍ଟ ହୋଇଥିଲା ଯାହାକି ଆରମ୍ଭରୁ ଅଭିଯୋଗ ହୋଇ ଆସୁଥିଲା ।ସ୍ଥାନୀୟ ବିଧାୟକ ଅତନୁ ସବ୍ୟସାଚୀ ନାୟକଙ୍କ ପ୍ରଭାବରେ କେନ୍ଦ୍ରାପଡା ପୋଲିସ୍ ମିଥ୍ୟା ଷ୍ଟୋରୀ ରଚନା କରି ତଦନ୍ତ ବନ୍ଦ କରି ଦେଇଛି । ସେଥିପାଇଁ ବାରମ୍ବାର ପରିବାର ତରଫରୁ କ୍ରାଇମ୍ ବ୍ରାଂଚ୍ ତଦନ୍ତ ଦାବୀ ହୋଇ ଆସୁଥିଲା ଏବଂ  ଓଡିଶା ସୂଚନା ଅଧିକାର ଅଭିଯାନ ତରଫରୁ ଉଚ୍ଚସ୍ତରୀୟ ତଦନ୍ତ ପାଇଁ ଦାବୀ କରା ଯାଇଥିଲା । କିନ୍ତୁ ଜିଲ୍ଲା ପୋଲିସ୍ ଏବଂ ରାଜ୍ୟ ପୋଲିସ ଉଭୟ ମିଳାମିଶା କରି ରଞ୍ଜନ ଦାସଙ୍କ ହତ୍ୟାକାଣ୍ଡକୁ ରାଜନୈତିକ ଚାପର ବଶବର୍ତୀ କରିଦେଲେ ।

ପରିଶେଷରେ ମୋର ମତାନୁସାରେ  ଏହି ଘଟଣାରେ ପୋଲିସ ପ୍ରଶାସନ-ଦୁର୍ନୀତିଖୋର୍ ରାଜନେତାଙ୍କ ମଧୁ ଚନ୍ଦ୍ରିକାକୁ ଏଡାଇ ଦିଆ ଯିବ ନାହିଁ । ଆମର ସଂସଦୀୟ ଗଣତନ୍ତ୍ର ଓ ସମାଜବାଦୀ ଶାସନ ବ୍ୟବସ୍ଥାରେ ପୋଲିସ ପ୍ରଶାସନକୁ ଏକ ଶ୍ରେଷ୍ଠ ସେବାକାରୀ ସଙ୍ଗଠନ ଭାବରେ ଗ୍ରହଣ କରା କରାଯାଇଥାଏ  । କିନ୍ତୁ ଏହା ଅତ୍ୟାଚାରୀ ଏବଂ ଚାମଚାଖୋରର ପ୍ରତୀକ ନୁହେଁ । ଏଥିପାଇଁ ରାଜନୈତିକ ସ୍ତରରେ ଜନତାଙ୍କ ପ୍ରତି ଏକ ନିଷ୍ଠତା ଏବଂ ବିଶ୍ୱସନୀୟତା ଦ୍ୱାରା ସମ୍ଭବ ହୋଇଥାଏ । ଉଭୟ ଯଦି ପଥଚୁ୍ୟତ ହୁଅନ୍ତି , ପରିଶେଷରେ ଜନତା ନ୍ୟାୟାଳୟ ଧାଇଁଥାଏ  ।  କିନ୍ତୁ ପୋଲିସ ଯଦି “ବିନା ମେଘେ ସୃଜି ପାରଇ କୁଳିଶ” ନୀତିରେ ଖିଲାପ କରେ, ତେବେ ଜନତା ନ୍ୟାୟ ପାଇବ କିପରି,ଯାହା ଆଜି ରଞ୍ଜନ ଭାଇ ହତ୍ୟାକାଣ୍ଡରେ ପ୍ରତୀୟମାନ ହୋଇଛି  । ରାଜନେତାଙ୍କୁ ତୁଷ୍ଟୀକରଣ କରିବା ପରି ପୋଲିସ ଦ୍ୱାରା ମିଛ କାହାଣୀ ରଚାଯାଇଛି ।ସୁପରିକଳ୍ପିତ ହତ୍ୟାକାଣ୍ଡକୁ ଦୁର୍ଘଟଣାର ରୂପ ଦିଆଯାଇଛି  । ଏହା ଦ୍ୱାରା ପୋଲିସ୍ ସର୍ବ ସାଧାରଣଙ୍କ ଦ୍ୱାରା ଆସ୍ଥା ଭାଜନ ହୋଇ ପାରିବ ତ ? ନା ଅଶୀ ଦଶକର  ଛବିରାଣୀ ହତ୍ୟାକାଣ୍ଡ ପରି ଏକବିଂଶ ଶତାଦ୍ଦୀରେ ଏହାର ପୁନରାବୃତି ହେବ ? ଦଳୀୟ ରାଜନୈତିକ ସ୍ବାର୍ଥ ଚରିତାର୍ଥ କରିବାର ମନୋବୃତିରେ ପୋଲିସ ନିୟୋଜିତ କରି ଶାସନ କଳକୁ ଅକାମୀ କରିବା  ଦ୍ୱାରା ସାଧାରଣ ଜନତା ସତରେ କଣ ନ୍ୟାୟ ପାଇବ ? ବାସ୍ ବାସ୍ ରଞ୍ଜନ ଭାଇ ! ତୁମେ ଯେଉଁଠି ଥାଅ ଭଲରେ ଥାଅ । ହେଲେ ମୋତେ ଲାଗେ ଆଜି ତୁମେ ଅତୃପ୍ତ  । ଯେଉଁ ବୁର୍ଜୁଆ ଶାସନ ପାଇଁ ସ୍ବର ଉଠାଉଥିଲ, ତାହା ଆଜି ଥମି ଗଲେ ମଧ୍ୟ ତୁମେ ଆମ ହୃଦୟରେ ଏକ ଅମ୍ଳାନ ପ୍ରଦୀପ ଝଟକୁଥିବ ଏକ ନୂଆ ଆଶା ଆଉ ପ୍ରେରଣା ନେଇ । ୠଞ୍ଜନ ଭାଇ ଅମର ରହେ ।

                                                          ସଂପାଦକ-ଉଦୟଭାନୁ,ଭୋଦଳ                                                                                                                                                              ପାଟସୁନ୍ଦରପୁର,କଟକ-୦୧୮

ଭୁଲିବନି କେବେ ମୋତେ,ପୁଣି ତୁମରି ଅପେକ୍ଷାରେ...