ଗତ କାଲିର ଦୁର୍ଘଟଣା । ତାରିଖ:୨୬/୦୩/୨୦୨୧,ସମୟ ପ୍ରାୟ ତିନି ଘଟିକା ।
ବାଗଲପୁର – ଝାରପଡା ରାସ୍ତାର ପ୍ରଥମେ କେନାଲ ବନ୍ଧ ଅତିକ୍ରମ କଲା ପରେ ପରେ ପୋଖରୀ ପୂର୍ବରୁ ଦୁଇଟି ବଣୁଆ ଗଛ । ଏଠାରେ ଏକଦା ବହୁ ବର୍ଷ ପୂର୍ବେ ଢାବାରୁ ଖାଇ-ପିଇ ଫେରିଲାବେଳେ ମଧ୍ୟ ରାତ୍ରୀ ସମୟରେ ଏକ ହୃଦୟ ବିଦାରକ ଦୁର୍ଘଟଣା ଘଟିଥିଲା ।ଦୁଇ ଜଣ ଯୁବକଙ୍କର ମୃତୁ୍ୟ ଘଟିଥିଲା । ଆଜି ପୁଣି ସେ ସ୍ଥାନରେ ଦୁର୍ଘଟଣା । ଦାମୋଦରପୁର ଗ୍ରାମର ଜନୈକ ଯୁବକ ବାଗଲପୁର ଦିଗରୁ ମୋଟର ସାଇକେଲ (ଓଡିଶା-୦୫ /ଏଚ୍ ୭୩୫୦)ରେ ଆସୁଥିବା ସମୟରେ ଭାର ସାମ୍ୟ ହରାଇ ଘୋଷାଡି ହୋଇ ପଡିବା ଅତ୍ୟନ୍ତ ଦୁଃଖ ଦାୟକ ଥିଲା । ମୁହଁର ଏକ ପାଶ୍ୱର୍ ସଂପୂର୍ଣ୍ଣ ଭାବରେ ଲହୁ ଲୁହାଣ ହୋଇ ପଡିଥିଲା । ଶରୀରର ବିଭିନ୍ନ ସ୍ଥାନରେ ଆଘାତ ଲାଗିଥିଲା । ପାଟିରୁ ଏକ ପ୍ରକାର ଫେଣ ବାହାରୁଥିଲା କହିଲେ ଚଳେ । ଦୁର୍ଘଟଣା ସମୟରେ ଆମେ ପ୍ରାୟ ଚାରି/ପାଂଚ ଜଣ ଥିଲୁ । ବିଚରା ଯୁବକଟି ଗୁରୁତର ଭାବରେ ପଡିଥିବା ସମୟରେ, ଡାକ୍ତରଖାନା ପଠାଇବା ପାଇଁ ୧୦୮କୁ ଫୋନ୍ କରିବା ପାଇଁ ଲାଗି ପଡିଲୁ । ଦୁଃଖର ବିଷୟ, କଂଟ୍ରୋଲ୍ ରୁମର ସୂଚନା ଅନୁଯାୟୀ ଅଡଶପୁର ଏବଂ ନିଆଳୀ ସ୍ବାସ୍ଥ୍ୟ କେନ୍ଦ୍ରରେ ଆମ୍ବୁଲାନ୍ସ ନଥିଲା । ମହୀଧରପଡା ସ୍ବାସ୍ଥ୍ୟ କେନ୍ଦ୍ରରୁ ଆମ୍ବ୍ୁଲାନସ୍ ପଠାଗଲା । କିନ୍ତୁ ଗାଡି କାହିଁ ? ଦୁର୍ଘଟଣାର ସମ୍ମୁଖୀନ ହୋଇଥିବ ଯୁବକଙ୍କୁା ମୋଟର ସାଇକେଲରେ ଆଉଜାଇବା ପରେ ଜନୈକ ଭଦ୍ରବ୍ୟକ୍ତି ଦେଇଥିବା ଗାମୁଛାରେ ଘୋଡାଇଦେଇଥିଲୁ । ଧିରେ ଧିରେ ଲୋକଙ୍କର ଭିଡ ଜମୁଥିଲା । ହେଲେ ୧୦୮ ଆମ୍ବୁଲାନ୍ସ ପାଇଁ ଆମେ ଦୁଇ ତିନି ଜଣଙ୍କ ମୋବାଇଲରୁ କଲ୍ କରି, ପ୍ରତି ପାଂଚ/ଦଶମିନିଟରେ କସରତ ଚାଲିଥିଲା ।
ଏମିତି ଫୋନ୍ କରି କରି ପ୍ରାୟ ଚାଳିଶ ମିନିଟ୍ ଚାଲିଗଲା । କିନ୍ତୁ ଆମ୍ବୁଲାନ୍ସର ଦେଖାନାହିଁ । ଧିରେ ଧିରେ ଉକ୍ତ ଯୁବକର ଘର ଲୋକ ଆସି ପହଁଚିଲେ । ପୁନଃ ପନ୍ଦର ମିନିଟ ଚାଲିଗଲା । ଦାମୋଦରପୁରରୁ ଆସିଥିବା କିଛି ବ୍ୟକ୍ତିଙ୍କ ମଧ୍ୟରୁ ମୋଟର ସାଇକେଲରେ ଦୁର୍ଘଟଣାଗ୍ରସ୍ତ ଯୁବକଙ୍କୁ ଡାକ୍ତରଖାନା ନେବା ପାଇଁ ବାହାରିଲେ । କିନ୍ତୁ ଯୁବକର ଶାରିରୀକ ଅବସ୍ଥା ଗୁରୁତର ହେତୁ, ଆମେ ମନା କଲୁ । ଦୁଃଖର ବିଷୟ, ଏଇ କାରଣ ହେତୁ, ପିଲାମାନଙ୍କର ଆମକୁ ଦି ପଦ ଦୋଅକ୍ଷରୀ ଶ୍ରବଣରେ ମନ ସନ୍ତୋଷ ହୋଇଗଲା । ସର୍ବଶେଷରେ ଘର ଲୋକଙ୍କ ଜିଦ୍ ଏବଂ ସଂକଟାପନ୍ନ ଅବସ୍ଥା ହେତୁ ମୋଟର ସାଇକେଲରେ ବୁହା ହୋଇ ଦୁର୍ଘଟଣାଗ୍ରସ୍ତ ଯୁବକକୁ ମେଡିକାଲ ନିଆଗଲା । ଅଡଶପୁର ସ୍ବାସ୍ଥ୍ୟ କେନ୍ଦ୍ର ନେବା ପରେ, ଯୁବକଟି ବାନ୍ତି କରୁଥିବାରୁ ପ୍ରାଥମିକ ଚିକିତ୍ସା ପରେ କଟକ ବଡ ମେଡିକାଲକୁ ପଠାଗଲା । ଯଦି କୌଣସି ଦୁର୍ଘଟଣା ପାଇଁ ୧୦୮କୁ ଆମ୍ବୁଲାନ୍ସ ପାଇଁ ଫୋନ୍ କଲେ, ପ୍ରାୟ ଦଶ କିଲୋମିଟର ରାସ୍ତା ପାଇଁ ଚାଳିଶ /ପଇଁଚାଳିଶ୍ ମିନିଟ୍ ଲାଗୁଛି ଏବଂ ଦୁର୍ଘଟଣାସ୍ଥଳରେ ୧୦୮କୁ ଆମ୍ବୁଲାନ୍ସ ପହଂଚି ପାରୁନାହିଁ,ଗୁରତର ରୋଗୀମାନଙ୍କୁ ଏହି ସେବା କେତେ ଦୂର ଫଳପ୍ରଦ ହେବ ଏହା ଅତ୍ୟନ୍ତ କ୍ଷୋଭର ବିଷୟ ଅଟେ । ଅନେକ ସମୟରେ ଠିକ୍ ସମୟରେ ଆମ୍ବୁଲାନ୍ସ ନ ପହଂଚିବା ହେତୁ ଅନେକ ରୋଗୀ ପ୍ରାଣ ହରାଇଛନ୍ତି । ଯଦି ଏହିପରି ଭାବରେ ସରକାର ଜନ ସାଧାରଣଙ୍କୁ ବିଳମ୍ବିତ ୧୦୮ ଆମ୍ବୁଲାନ୍ସ ସେବା ପ୍ରଦାନ କରନ୍ତି , ହୁଏତ ଦୁର୍ଘଟଣାସ୍ଥଳରେ ଯମପୁରକୁ ଆଡ୍ଭାନ୍ସ ଟିକେଟ ମିଳିଯିବ ।
ସାହାଯ୍ୟ ଓ ସହୋଯୋଗ କରିବା ମୋର ଉଦେଶ୍ୟ...
ReplyDelete🙏ଜୟ ଜଗନ୍ନାଥ 🙏